મહાપ્રજા ક્ષત્રિય પાટીદારોનો ઇતિહાસ તૈયાર કરવામાં અપ્રાપ્ય સંદર્ભ ગ્રંથો મેળવવા, હકીકતો એકઠી કરવા, સમયને અનુકૂળ એવાં વાસ્તવિક ચિત્રો તૈયાર કરાવવા, શિલાલેખો વાંચવા, ભીમ કવિના લખાણની અપભ્રંશ ભાષાને સમજવા અને બીજા અનેકલક્ષી અભ્યાસ માટે અમારે છેલ્લાં વીસ વર્ષથી અનેક ગડમથલો કરવીપડી છે, અનેક મુશ્કેલીઓ અને આર્થિક વિટંબણાઓ વેઠવી પડી છે.

આટલી બધી વિટંબણાઓ વેઠીને તૈયાર કરેલા આ પુસ્તકમાં પણ વાક્યરચના, જોડણી અને છાપકામની ભૂલો રહી ગઈ છે. ઐથિહાસિક બનાવો અને પ્રકરણોનો યોગ્ય ક્રમ સચવાયો નથી. ખૂટતી કડીઓ અને વિગતો માટે પરિશિષ્ટ મૂકી શકાયાં નથી.

ગુજરાતના દરેક જિલ્લામાંથી ઓછામાં ઓછું એકેક હજાર વર્ષનું એકેક પાટીદાર કુટુંબનું પેઢીનામું છાપવું હતું. પણ આવાં પેઢીનામાં સમય અને શક્તિના અભાવે મેળવી શકાયાં નથી, અને છાપી શક્યા નથી.

આ પુસ્તક અમારી શક્તિ અને સમજ પ્રમાણે ઘણી જ ઉતાવળથી છાપી નાંક્યું છે. છાપકામની આટલી ઝડપ છતાં પાટીદારોનાં મૂળિયાં શોધવામાં આ પુસ્તકમાં અમે બને ત્યાં સુધી કોઈ ઐતિહાસિક ભૂલ ચલાવી લીધી નથી. અને આમ કરીને આ ગ્રંથ ભવિષ્યમાં સમગ્ર દુનિયાના પાટીદારોનો એક ઐતિહાસિક દસ્તાવેજ બને અને એ રીતે આ પુસ્તક દુનિયાના પાટીદારો માટે એક ઐતિહાસિક બંધારણ બની રહેતો આ પુસ્તકની પાછળ ખર્ચેલ સમય, શક્તિ અને નાણાં સારા માર્ગે ખર્ચાયાં છે એમ ભારતનો પાટીદાર સમાજ તેમજબીજા બ્રાહ્મણ, ક્ષત્રિય અને વૈશ્ય કુળો પણ કહી શકશે.

આ ગ્રંથ લખવામાં તથા તૈયાર કરવામાં અમને ગુજરાતની નામી અનામી વ્યક્તિઓએ પ્રત્યક્ષ અને પરોક્ષ રીતે જે સહકાર આપ્યો છે તેની નામાવલિ ખૂબ લાંબી થાય છે. આ નામાવલિમાં મોટાભાગના અમારા કુટુંબીજનો, સગાંવ્હાલાં અને મિત્રોનો સમાવેશ થાયછે. એટલે આવાં નજીકનાં આપ્તજનોનાં નામો આપ્યા વિના આ સ્થળે આ ગ્રંથ તૈયાર કરવામાં અમને પ્રત્યક્ષ અને પરોક્ષ સહકાર આપનાર સૌનો ખૂબ ખૂબ આભાર માનીએ છીએ.

છતાં આ ગ્રંથ તૈયાર કરવામાં અમને પ્રથમ પ્રેરણા આપનાર સ્વ. મુરબ્બી ભાઈકાકા હતા. આ ગ્રંથના છાપેલા ફર્માઓ વાંચી અમને યોગ્ય સલાહ સૂચન આપનાર ગુજરાતના સહકારી તથા બેન્કિંગ ક્ષેત્રના અગ્રણી કાર્યકર્તા તથા પોતાના વતન દહેગામ (જી. અમદાવાદમાં) શ્રી વિઠ્ઠલભાઈ અમીન ફાઉન્ડેશન મારફતે આંખની આશીર્વાદ હોસ્પિટલ શરૂ કરી જેમણે લાખો લોકોના આશિર્વાદ મેળવ્યા છે તેવા શ્રી વિઠ્ઠલભાઈ પી. અમીન તથા સ્વ મુરબ્બી ભાઈકાકા આ બન્ને પાટીદાર મહાનુભાવોનો અમે ખૂબ ખૂબ આભાર માનીએ છીએ.

આ ગ્રન્થ હાલમાં તો ફક્ત ગુજરાતના કૂર્મી ક્ષત્રિય પાટીદારોને લગતો છે. ભારતના ઉત્તર પ્રદેશ, મધ્ય પ્રદેશ, કાશ્મીર, બંગાળ, બિહાર અને દક્ષિણ ભારતમાં કૂર્મી ક્ષત્રિયોની 10 કરોડ જેટલીવસતિ હાલમાં હોવા છતાં ગુજરાત બહારના ભારતના આ કૂર્મીઓના ઐતિહાસિક મૂળિયાં અમો શોધી શક્યા નથી.

ભવિષ્યનો વિદ્વાન વર્ગ ગુજરાત બહારના ભારતના કૂર્મી ક્ષત્રિયોના પેઢીનામાંના મૂળિયા આપી – આ ગ્રંથ સમસ્ત ભારતના કૂર્મી ક્ષત્રિયો માટે તૈયાર કરી આ ગ્રંથને ભારતની મહાપ્રજા કૂર્મી ક્ષત્રિયોનો ઇતિહાસ એવું સાર્થક નામ આપશે એવી અભિલાષાથી ગુજરાતના પાટીદારોના આ ઈતિહાસને ગુજરાતની મહાપ્રજા કૂર્મી ક્ષત્રિય પાટીદારોનો ઈતિહાસ એ નામે પ્રસિધ્ધ કરવા અમે સાહસ કર્યું છે.